फेसबुक प्रयोगकर्ता १ अर्ब ३९ करोड, नाफा दोब्बर

विश्वको सबैभन्दा ठूलो सोसल नेटवर्किङ साइट फेसबुकले पछिल्लो एक वर्षमा कम्पनीको मुनाफा दोब्बरले वृद्धि गर्न सफल भएको छ । फेसबुकले आफ्ना प्रयोगकताको संख्यामा समेत सन्तोषजनक वृद्धि गरेको रिपोर्टले देखाएको छ । वर्ष सन् २०१४ को अन्तिम त्रैमासिकमा फेसबुकले ७० करोड १० लाख अमेरिकी डलर मुनाफा कमाएको छ । यो सँगै फेसबुकको सन् २०१४ को वाषिर्क मुनाफा २ अर्ब ९० करोड पुगेको छ । जुन सन् २०१३ को भन्दा दोब्बरले बढि हो । फेसबुकले सन् २०१४ को चौथो त्रैमासिकमा आर्जन गरेको मुनाफा भने अघिल्लो वर्षको सोही अवधिको तुलनामा ३४ प्रतिशतले बढि हो । 

यो अवधिमा फेसबुकको विज्ञापनबाट आउने राजश्वमा ५३ प्रतिशतले वृद्धि भएको छ । फेसबुकको विज्ञापनिक राजश्व मध्ये ७० प्रतिशत मोबाइल विज्ञापनबाट आउने गर्दछ । फेसबुकले मुनाफामा मात्र होइन आफ्ना प्रयोगकर्तामा समेत सन्तोषजनक वृद्धि गर्न सफल भएको छ । फेसबुकको प्रयोगकर्ताको संख्या १ अर्ब ३९ करोड पुगेको छ । जुन अघिल्लो वर्षको भन्दा १३ प्रतिशतले बढि हो । फेसबुकका प्रमुख मार्क जुकरबर्गले सन् २०१४ मा फेसबुकले धेरै उपलब्धी हासिल गरेको बताए ।