धर्मको खोजिमा लेखिएको : नेपाली कविताहरु

धर्मको खोजिमा लेखिएको,
धेरै कलमहरु,
भिखारीको गोजीमा भेटिएछ,
भोको पेटको मलमहरु |

नाङ्गो जिन्दगीको भजनहरुमा,
पाइला पाइलाको ठोक्करहरु ,
गोजीमा धर्म बोकेर,
माला जप्ने जोकरहरु |

तिमीले आज के गरेउ,
चुहुने भाँडामा पानी भरेउ
ढोकामा आएको भिखारीलाई,
धर्मको आड़मा जिउंदै मारेउ |

जिन्दगीको पासा पल्टीएछ,
मृत्युले खेलेको गोटीमा,
उसको कथा लामो रहेछ,
लेखिएको एउटा रोटीमा |

आर्नोल्ड राई,
संत मेरीज हिल,
खर्सांग,
दार्जीलिंग |